Marigona Capristo Grace, shqiptarja nga Peja e famshme në Gjermani si këngëtare dhe modele

MANDY GRACE CAPRISTO – MARIGONA – ANËTARJA E GRUPIT TË NJOHUR “MONROSE” RIKTHEHET NË VENDLINDJE TË KËNDOJË SHQIP, DO TË REALIZOJ NJE VIDEO NË KOSOVË ME “MONROSE”

Mandy Grace Capristo ka lindur më 21 Mars 1990, në Mannheim të Gjermanisë me nënë gjermane dhe baba shqiptar, i cili i ka dhënë dhe emrin Marigona siç e njohin të gjithë miqtë e saj.

Së bashku me dy vajzat e tjera të grupit “Monrose”, prej disa vitesh kanë arritur të jenë një prej grupeve më popullorë në Gjermani, Austri dhe Zvicër, duke realizuar katër albume muzikorë, Albumi i tyre debutues “Temptation” u rendit në vend të parë në të tre këto shtete dhe në vend të pestë në hitparejdin Europian.

Muajin që shkoi, “Monrose” publikuan një prej këngëve më të mira të karrierës së tyre muzikore – “This Is Me”, duke treguar se vajzat vazhdojnë të kenë po të njëjtin sukses si prej fillimit. Ne biseduam për pak çaste me Marigonën, e cila na tregoi se ka vendosur të rikthehet në vendlindje jo vetëm për të realizuar një këngë në gjuhën shqipe, por dhe për të dhënë kontributin e saj në përmirësimin e jetesës së bashkatdhetarëve në nevojë.


Përshëndetje! Ku jeni në këto momente dhe me çfarë ishit duke u marrë?

Mandy-Grace: Momentalisht jam në shtëpinë time në Mannheim të Gjermanisë edhe po pushoj sot.

Juve të gjithë ju njohin si Mandy Grace Capristo, por emri juaj i vërtetë është Marigona, apo jo?
Mandy Grace Capristo është emri edhe mbiemri i nënës sime që ma ka dhënë, ndërsa Marigona është emri im i dytë nga babai.
Babai juaj nga është me origjinë tamam,d.m.th., nga cili qytet i Kosovës?
Nga një qytet shumë i bukur, Peja.
Normale që dhe juve jeni kaq e bukur e ju ka shpallur revista “FHM” si femra më seksi në Gjermani, pasi femrat e Pejës njihen për bukurinë e tyre. Ju keni lindur në Gjermani, po në Kosovë a keni jetuar apo vizituar ndonjëherë?
Po, këtu në Gjermani kam lindur dhe në Kosovë isha para 4 ditëve dhe ku qëndrova një javë. Aty kam pas dëshirë të qëndroja më gjatë, por kam pasur shumë angazhime se tani kemi realizuar një videoklip të ri…
Për videon “This is me” e keni fjalën?
Po.
Shumë më pëlqen ajo këngë, për mua është më e preferuara prej “Monrose”.
Po në Kosove a ju njohin?
Kur isha në Kosovë pata shumë intervista, edhe një takim me Ministrin e Kulturës. Nuk jam dhe shumë e njohur, por kam në plan që këtë vit ta realizoj një këngë në shqip.
Këngë solo, me grupin apo me ndonjë këngëtar shqiptar?
Këngën shqip solo, por do bëjmë një videoklip në Kosovë, baladë më grupin “Monrose” dhe të gjitha fitimet e këtij videoklipi do t’ia dhurojmë organizatave bamirëse në Kosovë.
Për cilën këngë bëhet fjalë?
Këngën “Breath You In”, e cila është e realizuar në albumin e ri.
Po në Shqipëri do vini të na vizitoni me vajzat e grupit?
Nëse marrim ndonjë ftesë, patjetër. (E dëgjove Ardit? Ja ta gjeta dhe grupin përshëndetës për “Kënga Magjike” hihihii ps. Shënim i Elbinos)
Ju që e vogël jeni aktivizuar me muzikë, bile, keni pasur dhe këngë në albumin “Kidy Kontest: vol 8″, i cili është renditur në vend të parë në Austri. Kush ju ka shtyrë drejt muzikës?
Muzikën gjithmonë e kam dashur dhe kam kënduar që shumë e vogël. Gjithmonë kam imituar artistë të mëdhënj si Michael Jackson, Madonna etj., por në shkollë fillore mësuesi im i muzikës më tha që kam shumë talent për muzikë dhe që të marr pjesë në “Kidy Kontest”.
Pra, mësuesi im është ai që e ka vënë re i pari talentin tim dhe përkrahje kam pas deri në maksimum nga familja dhe shoqëria. Shumë shqiptarë që jetojnë këtu më kanë votuar që të vlerësohem e para në “Kiddy kontest” dhe dua t’i falënderoj.
Çfarë mendojnë prindërit tuaj për karrierën dhe suksesin që keni arritur?
Prindërit e mi janë shumë krenarë për mua edhe më përkrahin shumë, por janë dhe kritikuesit e mi më të mëdhenj.
Pas “Kiddy Kontest” ju konkurruat në “PopStars”. Kishit ndonjë parandjenjë se do të fitonit?
Të them të drejtën jo, sepse unë isha më e vogla, vetëm 16-vjeçare dhe aty ishin mbi 30.000 konkurrentë dhe nuk e kam ëndërruar kurrë se do jem fituese, por provat që i bënim aty, edhe konkurrenca pasi e pashë, më ka bërë të fitoj shumë vetëbesim.

Në të njëjtin konkurs kanë bërë emër dhe dy shqiptare të tjera, Miriam Cani dhe Ari…

Po. Miriam Cani ishte më përpara nuk e di tash saktësisht në cilin vit, ndërsa Ari (Arijeta Zhuta) ishte me mua deri në finale, ku nuk arrti të hyjë në grup.
Unë e kam ndjekur atë, por për juve nuk më ka shkuar mendja për shkak të emrit. Vura re që e ndiqni mirë muzikën shqiptare. Cilët këngëtarë shqiptarë preferoni më së tepërmi?
Ka shumë këngëtar shqiptarë që më pëlqejnë, po i përmend disa emra që për mendimin tim ia vlen me i përmend. Diva e muzikës shqiptare, Adelina Ismaili, Genta, Elvana Gjata, Flori…
Po ju në këngën tuaj shqip, me cilin kompozitor keni vendosur të punoni apo ende nuk e keni vendosur?
Me Eduart Remanicën, të cilin e kam shumë shok dhe me të do bashkëpunojmë dhe në të ardhmen.
Ndërkohë, cilat janë planet me “Monrose” për këtë fundvit dhe vitin e ardhshëm?
Kemi shumë plane. Kemi një turne e më pas do shkojmë në L.A., (ShBA) për të regjistruar albumin e ri.

Keni menduar se ndoshta një ditë mund të ndodhë me ju e njëjta gjë që ndodhi dhe me “Preluders”, pra të ndaheni dhe të vazhdoni karrierat si soliste?
Pra… natyrisht që njeriu mendon se gjithmonë grupi nuk ekziston, kemi shumë aktivitete të tjera që janë jashtë fushës së muzikës. Unë me modelim, Senna dhe Bahr në moderim, por një herë është koha e Monrose dhe nuk mendojmë për këtë.
Shumë krenare jam, së pari që një grup i krijuar nga një konkurs televiziv vazhdon ende të bëj muzikë me sukses se të gjitha zakonisht e bëjnë nga një album dhe fund. Për këtë shumë e falënderoj producentin tonë, Mikkel Remee Sigvardt dhe menaxherin tonë, Ton Joey, pa ndihmën e tyre nuk i kishim pasur sot katër albume.
Unë shpresoj që të keni një jetë sa më të gjatë, pasi jeni shumë cool së bashku, jeni një kombinim shumë i mirë. Këtë desha t’ju uroja në përfundim të kësaj interviste e ndërkohë suksese me albumin e ri dhe singlën fantastike “This Is Me”!
Faleminderit shumë dhe ju uroj edhe juve gjithashtu suksese e shumë falënderime për intervistën.

Shekulli