Besa & Arberi - Lamtumirë Madalenna! Tani Arbri rri me Besartën

Panorama PLUS

Ornela Caci

Nuk mund ta themi me siguri të plotë, por faktet në bëjnë të mendojmë se mes Arbrit dhe Besartës mund të ketë filluar një histori dashurie. Rreth një javë më parë, disa ish-banorë të shtëpisë së “Big Brother” morën pjesë në ditëlindjen e Besartës në Gjilan. Pritja ishte e jashtëzakonshme jo vetëm nga familja e Besartës por nga të gjithë fansat e programit “Big Brother”. Ishin ftuar në ditëlindje të gjithë ish-banorët, por morën pjesë vetëm Çimi me familjen, Astriti me bashkëshorten, Ingridi, Ina, Poli, Visi, Dorina, Julinda me të dashurin dhe i ftuari i nderit i cili nuk erdhi me grupin por me familjen e tij, ishte Arbri. Mbas festës në një disko të Gjilanit ku u krye edhe riti tradicional i prerjes së tortës, të gjithë banorët u akomoduan në një nga vilat që janë pronë e familjes së Besartës, ndërsa Arbri me familjen u ftuan në ambientin ku jeton Besarta me familjen e saj. Gjithçka ngjan thjesht me disa gjeste shumë të ngrohta mikpritjeje, shumë të spikatura këto në traditën e kosovarëve. Ndërkohë sipas burimeve tona marrim vesh se pak ditë më parë Besarta i ka kthyer vizitën Arbrit dhe a e dini se ku po flen Besarta këto ditë? Tek shtëpia e Arbrit... Madje një informatori ynë ka parë pardje Besartën me Arbrin diku afër shtëpisë së këtij të fundit diku tek rruga “Myslym Shyri” teksa çonin në pallat kova me ujë. Në fakt po t’i pyesim dy të rinjtë ata mund ta hedhin poshtë variantin e një historie dashurie. Por ne kemi disa fakte që na bëjnë të besojmë që kjo mund të jetë e vërtetë: e para Besarta brenda shtëpisë së “Big Brother” por edhe jashtë saj nuk e ka fshehur asnjëherë simpatinë për Arbrin, ajo nuk është e lidhur me ndonjë djalë dhe mos harroni, Besa është kosovare dhe Arbri ka dobësi për Kosovën si djalë me një patriotizëm të spikatur. Ndërsa Arbri mesa shihet ka të arkivuar tashmë historinë me Madalennën edhe pse nuk e shpreh dhe në fund të fundit Besarta është 20 vjeç, shumë e këndshme në pamje dhe e mençuar. Çfarë duhet më tepër që mes dy të rinjve të lindë një dashuri? Gjithsesi ne do arrijmë të sigurojmë më shumë informcion në ditët në vazhdim dhe nëse kjo që sapo thamë është e vërtetë, mund të thuhet me plot gojë që ky “Big Brother” paska qenë shumë i begatë, sepse bëri personazhe vip shumë të rinj, por atje u krijuan edhe tre çifte; Najada - Olsi, Ina - Poli dhe mesa duket edhe Arbri - Besa.

Gazeta Panorama